کاشان جن اپنے اڑنے والے قالین پر مزے سے آسمان کی سیر کر رہا تھا کہ اچانک تیز ہواٸیں چلنا شروع ہو گٸیں دیکھتے ہی دیکھتے ان ہواٶں نے طوفان کی صورت اختیار کر لی۔ اچانک اس کا قالین ڈگمگانے لگا اور پھر قالین زمین کی طرف تیزی سے آنے لگا۔
اس نے قالین کو مضبوطی سے تھام لیا جبکہ قالین تیزی سے زمین کی طرف آرہا تھا۔ یہ دیکھ کر کاشان کے اوسان خطا ہونے لگے اس سے پہلے کہ قالین زمین پر گرتا اچانک قالین ایک درخت کی شاخوں میں پھنس کر رہ گیا اور جگہ جگہ سے پھٹ گیا کچھ دیر بعد طوفان تھما وہ فوراً قالین سمیت درخت سے اترا اس نے پھٹے ہوٸے قالین کو دیکھا تو اپنا سر پکڑ کر رہ گیا۔ اس نے ڈرتے ڈرتے قالین کو زمین پر رکھا اور پھر اس پر سوار ہو کر اسے اڑنے کا حکم دیا آخر وہ ہی ہوا جس کا اسے ڈر تھا قالین اب اڑنے کے قابل نہیں رہا تھا۔ اسی دوران ایک بزرگ اقالو جن بابا جو وہاں موجود تھے وہ اس کی اس حالتِ زار دیکھ کر افسوس کرنے لگے۔ کاشان نے انہیں دیکھا تو وہ ان کے پاس آتے ہوٸے بولا۔۔” دیکھیں ناں بابا میرا اڑنے والا قالین درخت کی ٹہنی میں پھنس کر جگہ جگہ سے پھٹ کر ناکارہ ہوگیا ہے، یہ واحد میرے باپ دادا کی نشانی ہے جو ہزاروں سال سے میرے پاس ہے۔ مجھ میں اڑنے کی صلاحیت تو موجود ہے مگر جو مزہ قالین پہ اڑنے کا ہے اس کی بات ہی کچھ اور ہے۔ اب بتاٸیں میں کیا کروں؟“
وہ روہانسی آواز میں بولا۔
وہ کچھ دیر سوچتے ہوٸے بولے۔ ” ایک طریقہ ہے اسے اڑنے کے قابل کرنے کا“
” وہ کیا؟“
کاشان خوش ہوتے ہوٸے بولا۔۔
” وہ یہ کہ یہاں سے بہت دور ایک ثمر قند نامی ملک ہے وہاں ایک بازار ہے جس میں ایک رفو گر احمد نامی شخص کی دکان ہے اس رفوگر کے ہاتھ میں ایسی صفاٸی ہے کہ وہ کیسی ہی پھٹی سے پھٹی چیز کو رفو کر کے اسے اصل صورت میں لانے کا ماہر ہے۔ تم اس سے اپنا قالین رفو کروالو قالین دوبارہ اڑنے کے قابل ہو جاٸے گا“
”ٹھیک ہے میں آج ہی انسانی روپ دھار کر ثمر قند روانہ ہوتا ہوں“
وہ خوش ہوتے ہوٸے بولا۔۔
اسی دوران اچانک اقالو جن بابا چونکے وہ کچھ دیر ایک طرف دیکھتے رہے پھر وہ اپنے کندھے اچکاتے ہوٸے آگے کی طرف بڑھ گٸے۔ جبکہ کاشان خوشی خوشی اپنی بغل میں قالین دباٸے ثمر قند کی طرف روانہ ہوگیا۔۔
ان دونوں کے جانے کے بعد اچانک ایک بونا درخت کی اوٹ سے نکلا جو ان دونوں کی گفتگو سن رہا تھا۔ یہ بونا ایک شوہان نامی جادوگر کا جاسوس تھا جو کسی مقصد کے تحت جن وادی میں رہتا تھا اچانک اس کے چہرے پر ایک شیطانی مسکراہٹ ابھری پھر اس نے ایک سمت کو دوڑ لگا دی۔۔
****************************
اب کاشان جن کی منزل ثمر قند تھی وہ منٹوں میں ہی ثمر قند کے اس بازار میں پہنچ گیا جس کا پتہ اقالوجن بابا نے بتایا تھا۔۔اس نےایک سے احمد رفوگر کی دکان کا پتہ معلوم کیا اور پھر اس کی دکان میں داخل ہوا۔۔احمد اپنے کام میں مشغول تھا کہ کاشان نے اس سے پوچھا ” مجھے احمد رفوگر سے ملنا ہے“ ”جی میں ہی ہوں “ وہ اپنا کام روکتے ہوٸے بولا۔۔” دراصل میرے پاس ایک قالین ہے جو کسی وجہ سے جگہ جگہ سے پھٹ گیا ہے بس اسے رفو کروانا ہے“ کاشان اسے قالین دکھاتے ہوٸے بولا۔۔احمد نے فوراً وہ قالین لیا اور پھر اسے غور سے دیکھتے ہوٸے بولا۔۔
” یہ تو کوٸی نایاب قالین لگتا ہے ایسا قالین میں نے اپنی زندگی میں نہیں دیکھا۔ بہرحال اسے میرے پاس چھوڑ جاٶ اور دو دن بعد آکر اپنا قالین لے جانا“
”یہ بہت قیمتی قالین ہے اسے حفاظت سے رکھنا“ کاشان بولا۔۔” یہ اب میرے پاس آپ کی امانت ہے
بے فکر ہو کر جاٸیں“ یہ کہہ کر اس نے قالین ایک طرف رکھا اور پھر سے اپنے کام میں مشغول ہوگیا۔۔جبکہ کاشان اس کی دکان سے باہر آگیا۔۔
**********************************
بونا تیزی سے بھاگتا ہوا جارہا تھا اس کا رخ جن وادی کے جنوبی حصے کی طرف تھا۔۔ جن وادی سے باہر ایک کالے رنگ کا پہاڑ تھا اس میں ایک غار بنا ہوا تھا یہ غار شوہان جادوگر کا تھا۔۔بونا غار میں داخل ہوا۔۔” کیا بات ہے ایسے ہانپتے ہوٸے کیوں آرہے ہو؟ سب خیریت تو ہے ناں“ شوہان اس کی ایسی حالت دیکھتے ہوٸے بولا۔۔” شوہان تمھارے لٸے ایک بہت بڑی خوش خبری ہے“ بونا اپنی بانچھیں پھیلاتے ہوٸے بولا۔۔ ” اچھا وہ کیا ؟“ اس نے تجسس سے پوچھا۔ ”کاشان جن کا اڑنے والا قالین جسے تم اپنے قبضے میں کرنا چاہتے تھے وہ کسی ٹہنی میں پھنس کر ناکارہ ہوگیا ہے اور اب وہ قالین کاشان ثمر قند میں ایک رفوگر کو رفو کرنے کے لٸے دینے گیا“ بونا اسے تفصیل بتاتے ہوٸے بولا۔”خوب بہت خوب٬ میں تمھاری بات کا مطلب سمجھ گیا تم کہنا چاہتے ہو کہ کسی طرح قالین وہاں سے چرا کر اپنے قبضے میں کر لوں“ ”جی بلکل بلکل“ بونا بولا۔ ”تم یہ بہت بڑی خبر لاٸے ہو کیونکہ جن وادی میں میرا جادو نہیں چل سکتا اور اسے چرانا تقریباً ناممکن ہی تھا۔ جبکہ انسانوں کی بستی سے چرانا نہایت آسان ہے۔ اب ہمیں اس وقت کا انتظار ہے جب وہ قالین رفو ہوجاٸے گا اور اس سے پہلے کاشان وہ قالین حاصل کرٸے ہم وہ قالین لے اڑیں گے۔“ ہاہاہا!!!! یہ کہہ کر دونوں قہقہہ مار کر ہنسنے لگے۔
**********************************
کاشان جن نے دو دن بڑی مشکل سے گزارے۔۔دو دن بعد وہ فوراً احمد رفو گر کی دکان پر پہنچا۔” میرا قالین تیار ہوگیا ہے؟“ اس نے دکان کے اندر داخل ہوتے ہوٸے پوچھا۔ ”جی بلکل تیار ہوگیا ہے ہم اپنے گاہک سے جو زبان کرتے ہیں وہ ضرور پورا کرتے ہیں“ یہ کہہ اس نے ایک طرف سے قالین اٹھا کر اسے دیتے ہوٸے بولا۔۔”یہ لیں اپنا قالین اور اسے دیکھ کر تسلی کر لیں“ اس نے فوراً اس سے قالین لیا اور الٹ پلٹ کر دیکھنے لگا۔” واقعی! جیسی آپ کی تعریف سنی تھی ویسا ہی پایا ہے۔ کیا صفاٸی ہے آپ کے ہاتھوں میں“
پھر وہ اسکو اس کی اجرت دے کر خوشی خوشی وہاں سے اپنی جن بستی راوانہ ہو گیا۔
************************
شوہان جادوگر اپنی غار میں آلتی پالتی مار کر آنکھیں بند کٸے ایک عمل میں مصروف تھا۔ پاس ہی بونا بھی بیٹھا ہوا تھا۔ اچانک جادوگر نے آنکھیں کھولی اور پھر بونے سے سےمخاطب ہوا۔ ”فوراً نقلی قالین اٹھاؤ جو میں نے جادو سے بلکل اس جیسا ہی بنایا ہوا ہے اور جس میں باقاعدہ رفو کا کام بھی کیا گیا ہے۔ اب ہمیں ثمر قند چلنا ہوگا کیونکہ اڑنے والا قالین رفو ہوچکا ہے۔ اس سے پہلے کہ کاشان جن اسے لے کر جاٸے ہمیں اس قالین کو حاصل کرنا ہوگا۔ اور اس کی جگہ اس نقلی قالین کو رکھنا ہوگا۔“ یہ سن کر بونا فوراً نقلی قالین کو اٹھانے لگا۔۔
رات گہری ہوچلی تھی۔ شوہان اور بونا احمد رفو گر کی دکان کے پاس کھڑٸے تھے۔ دکان میں تالا لگا ہوا تھا۔ جادوگر نے کوٸی منتر پڑھا تالا فوراً کھل گیا۔ بونا نقلی قالین بغل میں دباٸے دکان کے اندر داخل ہوا۔ اور پھر جب وہ واپس آیا تو اس کے ہاتھ میں اصلی قالین تھا۔ جسے دیکھ کر جادوگر خوشی سے ناچنے لگا۔ بونے نے پہلے تالا کو دوبارہ بند کیا اور پھر قالین کو زمین پر بچھاتے ہوٸے بولا۔۔”آٶ شوہان تمھارا اڑنے والا قالین تمھارا انتظار کر رہا ہے“ جادوگر فوراً قالین پر کود کر کھڑا ہوگیا۔ بونا بھی قالین پر کھڑا ہوگیا۔ پھر اس کے بعد جادوگر نے اسے اڑنے کا حکم دیا۔۔اچانک قالین ہلنے لگا اور پھر فضاٶں میں اڑنے لگا۔۔یہ دیکھ کر جادوگر خوشی سے جھوم اٹھا جبکہ بونا قالین کو اڑتا دیکھ کر تالیاں بجانے لگا۔
*****************************
کاشان جن خوشی خوشی اپنا قالین لٸے اپنی جن وادی میں داخل ہوا۔ پھر اس نے قالین زمین پہ بچھا کر فوراً اس پر سوار ہوا اور اسے اڑنے کا حکم دیا۔۔ قالین اصلی ہوتا تو اڑتا بھی٬ وہ قالین ٹس سے مس نہ ہوا۔ اسے احمد رفوگر پر بے حد غصہ آنے لگا۔ وہ فوراً ثمر قند روانہ ہوا۔۔وہ تھوڑی ہی دیر میں احمد کے روبرو کھڑا تھا۔وہ قالین اس کی طرف اچھالتے ہوٸے بولا۔۔” یہ تم نے میرا قالین کیسا رفو کیا ہے۔ تمھیں معلوم نہیں٬ یہ کوٸی عام قالین نہیں ہے بلکہ ایک جادوٸی اڑنے والا قالین ہے۔اور میں کوٸی عام انسان نہیں بلکہ ایک جن ہوں“ یہ کہہ کر وہ اپنی اصلی صورت میں آگیا۔۔اپنے سامنے ایک جن کو دیکھ کر احمد کی حالت غیر ہوگٸی۔ اس کی حالت کچھ سنبھلی تو وہ بولا۔۔”دیکھو میں اپنا کام بڑی محنت اور ایمانداری سے کرتا ہوں۔ جبھی اللہ پاک نے میرے ہاتھ میں صفاٸی رکھی ہوٸی ہے۔اور میں نے بہت صفاٸٰ سے اپنا کام کیا ہے۔ پھر بھی مجھے ایک نظر قالین دکھاٸیں شاید کوٸی کمی رہ گٸی ہو۔۔“یہ کہہ کر اس نے قالین لیا اور الٹ پلٹ کر دیکھنے نےلگا۔۔پھر اچانک وہ چیخا۔۔”یہ وہ قالین نہیں ہے جو تم مجھے دے کر گٸے تھے۔۔یہ تو کوٸی اور قالین ہے میں اپنے ہاتھ کا کام اچھی طرح پہچان سکتا ہوں۔ اس میں میرے ہاتھ کا کام نہیں ہوا ہے“ ”کیا!“
یہ سن کر کاشان کا منھ حیرت سے کھلا کا کھلا رہ گیا۔۔
****************************
کاشان جن نقلی قالین لٸے اقالو جن بابا کے پاس افسردہ بیٹھا ہوا تھا۔۔ اقالو جن بابا جو اس کی پوری بات سن چکے تھے بولے۔۔” سوچنے والی بات یہ ہے کہ قالین رفو کرنے والی بات صرف میں اور تم جانتے تھے کسی اور کو کیسے معلوم ہوا کہ تم اپنا اڑنے والا قالین رفو کروانے احمد رفوگر کو دے کر آٸے ہو۔ جو اس نے وہ قالین چرا لیا“ ”جی بابا یہی تو میں بھی سوچ رہا ہوں کہ ہمارے علاوہ اور کون وہاں موجود تھا“ ”ایک منٹ! مجھے یاد آیا جب ہم دونوں باتیں کر رہے تھے تو اس وقت مجھے ایک پست سایہ نظر آیا تھا ۔ اس وقت میرا ماتھا ٹھنکا ضرور تھا پر میں اس وقت سمجھ نہیں سکا تھا اب مجھے یقین ہے کہ ضرور کوٸی پست قد کا ہوگا جو ہماری گفتگو سن رہا تھا۔۔اور مجھے شک ہے کہ یہ وہ ہی بونا ہوگا جسے اکثر میں نے جن وادی میں دیکھا ہے اور وہ یقیناً جن وادی کی خبریں کسی کو پہنچاتا ہے اور وہ٬ وہی ہوگا جس نے تمھارا قالین چرایا ہے۔۔“ ”اب آپ مجھے بتاٸیں میں اپنا قالین کیسے حاصل کروں“ اس نے بےبسی کے عالم میں پوچھا۔ جن بابا کچھ دیر سوچتے رہے پھر وہ سرگوشی میں اسے کچھ کہنے لگیں۔۔جسے سن کر اس کی آنکھیں حیرت سے پھیلنے لگیں۔
***************************
”سنا ہے تمھارا اڑنے والا قالین چوری ہوگیا ہے۔ وادی کےایک جن نے کاشان جن سے پوچھا۔ ”ہاں نہ جانے کس نے چرایا ہے۔ لیکن جس نے چرایا ہے اسے قالین کی ایک خصوصیت کا علم ہی نہیں“ ”کیسی خصوصیت “ دوسرے جن نے تجسس سے پوچھا ”وہ یہ کہ چودہویں کی رات کو جن وادی کے مشرقی حصے کی طرف موجود ایک بہت بڑی چوٹی ہے اس پر قالین کو رکھا جاٸے تو چاند سے کچھ خصوصی شعاٸیں نکلتی ہیں جو قالین میں جذب ہوجاتی ہیں اس قالین میں بہت سا پانی ڈالا جاٸے اور پھر اسے چاند کی شعاعیں جذب ہونے کے بعد نچوڑا جاٸے تو وہ پانی سونے کی شکل اختیار کر لیتا ہے۔ “ ”کیا واقعی! “ یہ سن کر اس کی آنکھیں باہر آگٸیں“ ”ہاں واقعی۔ اور وہ سونا عام سونے سے بہت نایاب ہے اس کا اگر ہار بنا کر پہنا جاٸے تو دور سے چمکتا ہوا نظر آٸے۔ اور ایسی رات ہر پانچ سو سال بعد آتی ہے اور تمھیں پتہ ہے کہ وہ رات آج کی رات ہے جو ٹھیک پانچ سو سال کے بعد آرہی ہے“ ”کاش قالین تمھارے پاس ہوتا تو تم بہت نایاب سونا پا سکتے تھے“ دوسرا جن بولا۔۔”ہاں صحیع کہہ رہے ہو۔ بس قسمت کی بات ہے میری قسمت میں نہیں تھا۔“ وہ افسردہ لہجے میں بولا۔ پھر دونوں باتیں کرتے ہوٸے ایک سمت کو چلے گٸے ۔۔ اسی دوران ایک جھاڑی سے بونا نمودار ہوا۔ پھر وہ خود سے ہمکلام ہوتے ہوٸے بولا۔۔ ”واہ کیا خبر ہے مجھے فوراً یہ خبر شوہان کو بتانی ہوگی“ یہ کہہ کر فوراً شوہان کی غار کی طرف روانہ ہوگیا۔
تھوڑی دیر میں ہی بونا غار پہنچا وہ شوہان کو پکارتے ہوٸے غار میں داخل ہوا لیکن شوہان وہاں موجود نہیں تھا۔۔وہ فوراً غار سے باہر آیا اور بے چینی کے عالم میں شوہان کا انتظار کرنے لگا۔ ابھی کچھ دیر ہی گزری ہوگی کہ اچانک اسے شوہان قالین پہ اڑتا ہوا نظر آیا اسے دیکھ کر بونا اپنا ہاتھ زور زور سے ہلا کر اسے پکارنے لگا۔۔ شوہان اس کے پاس اترے ہوٸے بولا۔۔”لگتا ہے جن وادی سے کوٸی بہت بڑی خبر لاٸے ہو“ ”ہاں بہت بڑی خبر ہے“ ”اچھا پھر جلدی سے سناٶ“ پھر بونے نے کاشان جن سے جو کچھ سنا تھا اسے بتادیا“ وہ یہ سب سن کر خوشی سے جھوم اٹھا اور بولا ”خبر تو بہت بڑی ہے پر اس میں ایک خطرہ ہے “ ”وہ کیا؟“ بونے نے تجسس سے پوچھا۔ اس پر پر شوہان بولا۔۔ ” تمھیں شاید معلوم نہیں کہ وہ چوٹی نہایت بلندی پر ہے اور بہت خطرناک ہے۔ اس کے نیچے صرف گہری کھاٸی ہے۔ اگر گر گٸے تو بچنا مشکل ہی نہیں ناممکن ہے۔ اور ویسے بھی تمھیں معلوم ہے کہ جن وادی میں میرا جادو بے اثر ہے“ ”ہاں ! یہ تو ہے۔۔پر ہم چوٹی پر چڑھ کر تھوڑی جاٸینگے اڑنے والے قالین پر جاٸیں گے اور اسی پر واپس آجاٸیں گے اس میں پریشانی والی کون سی بات ہے۔ “ بونا اسے سمجھاتے ہوٸے بولا۔۔”ٹھیک ہے پھر آج رات ہم ضرور چلیں گے آخر سونا حاصل کرنا ہے وہ بھی نایاب سونا“ وہ اپنے چہرے پر مسکراہٹ لاتے ہوٸے بولا۔۔
***********************
رات کی تاریکی میں شوہان بونے کے ساتھ اڑنے والے قالین پہ سوار جن وادی میں داخل ہوا اور پھر اس چوٹی پر پہنچ گیا۔۔۔ ”کس قدر اونچاٸی ہے اس چوٹی کی اور نیچے تو صرف گہری کھاٸی ہے واقعی بہت خطرناک چوٹی ہے “ بونا قالین سے اترتے ہوٸے بولا۔ ”ہاں پر کیا کرٸیں آنا تو تھا ہی اس چوٹی پر آخر نایاب سونے کا معاملہ ہے۔ اچھا چلو جلدی سے قالین پہ پانی ڈالو اور خوب ڈالو تاکہ اچھی طرح پانی قالین میں جذب ہو جاٸے اور سونا بھر بھر نکلے۔“ یہ سن کر بونا فوراً قالین میں پانی ڈالنے لگا جو وہ کسی چیز میں بھر کر لایا تھا۔ تھوڑی ہی دیر میں قالین پانی سے خوب جذب ہوچکا تھا۔۔ قالین پانی سے خوب تر ہونے کے بعد اور پھر چاند کی شعاعیں پڑنے کے بعد شوہان قالین نچوڑنے لگا تاکہ سونا نکلے۔۔کافی جدوجہد کے بعد بھی اس میں سے صرف پانی ہی ٹپکتا رہا“ ”یہ کیا اس میں سے تو صرف پانی ہی نکل رہا ہے سونا کیوں نہیں نکل رہا ؟“ وہ بونے پر برستے ہوٸے بولا۔“ ”اب مجھے کیا معلوم کہ سونا کیوں نہیں نکل رہا“ بونا روہانسی آواز میں بولا۔۔” مجھے تو کوٸی گڑ بڑ لگتی ہے ہمیں یہاں سے فوراً نکلنا ہوگا۔“ یہ کہہ کر وہ قالین پر سورا ہوگیا۔ بونا بھی چھلانگ مار کر قالین پر سوار ہوا۔ بونے کے سوار ہوتے ہی شوہان نے قالین کو اڑنے کا حکم دیا۔قالین میں معمولی سی جنبش ہوٸی مگر وہ اڑا نہیں۔ ”یہ قالین کو کیا ہوگیا ہے اڑ کیوں نہیں رہا؟“ وہ چیختے ہوٸے بولا۔۔ ”کیونکہ پانی جذب ہوجانے کی وجہ سے قالین بھاری ہوگیا ہے اس لٸے نہیں اڑ پا رہا۔ پانی سوکھنے کے بعد ہی یہ اڑ سکے گا“ اچانک ایک آواز ان کے کانوں سے ٹکراٸی۔ وہ آواز کاشان جن کی تھی اچانک کاشان ان کے سامنے آکر کھڑا ہوگیا۔۔اسے دیکھ کر دونوں کے اوسان خطا ہوگٸے اور وہ دونوں فوراً قالین سے اتر کر پیچھے کی طرف ہونے لگے۔کاشان نے فوراً قالین کو اپنے قبضے میں کیا۔ اور پھر وہ بولا۔ ” ہماری گفتگو جو بونے نے سن کر تم تک پہنچاٸی تھی اس کا حقیقت سے کوٸی تعلق نہیں ہے۔ بلکہ یہ ہمارا منصوبہ تھا تم سے قالین حاصل کرنے کا ٬ کیونکہ ہمیں معلوم تھا کہ ہماری بات بونے کے زریعے تم تک ضرور پہنچے گی۔اور سونا پانے کی لالچ میں تم اس چوٹی پر ضرور آٶ گے آخر وہ ہی ہوا اور ہمارا منصوبہ کامیاب ہوگیا۔“ یہ سن کر شوہان جادوگر کی آنکھیں حیرت کے مارے پھیلنے لگیں۔ ” یعنی ہمارے ساتھ دھوکہ ہوا ہے“ شوہان غصے سے بولا۔۔”اپنی چیز حاصل کرنا دھوکہ نہیں ہوتا اب تمھاری یہی سزا ہے کہ تم اس خطرناک چوٹی سے کبھی نکل نہیں پاٶ گے۔“ شوہان فضا میں اڑتے ہوٸے بولا۔۔”یہ سب تمھاری وجہ سے ہوا ہے نہ ہی تم یہ جھوٹی خبر لاتے اور نہ ہی میں اس چوٹی پہ پھنستا “ شوہان جادوگر غصے سے آگ بگولہ ہوتے ہوٸے بونے سے بولا۔۔اور پھر اس نے بونے کو ایک زور دار تھپڑ رسید کیا۔ تھپڑ اتنا زور دار تھا کہ بونے دور چوٹی کے کنارے پہ جا گرا اچانک اس کا پیر پھسلا اور پھر وہ چوٹی سے گرنے لگا۔ اس سے پہلے کہ وہ چوٹی سے گرتا اچانک ایک ابھرے ہوٸے پتھر کو اس نے مضبوطی سے تھام لیا۔ اب وہ اس پتھر کو پکڑے ہوٸے فضا میں لٹکا ہوا تھا۔ ”میری مدد کرو شوہان٬ میرا ہاتھ چھوٹ رہا ہے۔ “ بونا شوہان سے التجا کرتے ہوٸے بولا۔۔”میری بلا سے تم گہری کھاٸی میں گرو تمھاری یہی سزا ہے۔“ وہ اپنا منھ دوسری طرف پھیرتے ہوٸے بولا۔۔ اچانک بونے کا ہاتھ چھوٹا اک دم اس کی ایک چیخ بلند ہوٸی۔ اس سے پہلے کہ وہ گہری کھاٸی میں گرتا اچانک کاشان جن فضا میں اڑتا ہوا آیا اور بونے کو اپنے ہاتھ میں تھام لیا۔۔یہ دیکھ کر وہ حیران رہ گیا۔۔ ”مجھے معاف کردو کاشان میں نے تمھارا برا چاہا پر تم نے میری جان بچاٸی اور جس کا وفادار تھا اس نے میری جان لینے کی کوشش کی“ بونا پشیمان ہوتے ہوٸے بولا۔۔”دیکھو جو براٸی کا ساتھ دیتے ہیں وہ خود بھی بڑی مصیبت میں ضرور پھنس جاتے ہیں“ کاشان بونے سے بولا ”ہاں کاشان تم نے صحیع کہا براٸی کے راستے پہ چلنے والے ایک دن گہری کھاٸی میں ضرور گرتے ہیں٬ پر میں وعدہ کرتا ہوں کہ آج سے سچاٸی اور نیکی کے راستے پہ چلونگا کیونکہ ان ہی دو راستے پہ چلنے پہ بھلاٸی ہی بھلاٸی ہے“ بونا سچے دل سے توبہ کرتے ہوٸے بولا۔۔کاشان جن اپنے قالین اور بونے کے ساتھ جانے لگا انہیں جاتا دیکھ کر شوہان جادوگر چیختے ہوٸے بولا ”کاشان مجھے چھوڑ کر کہاں جارہے ہوں مجھے بھی یہاں سے نکالو“ ”براٸی کا راستہ تم نے خود چنا تھا اب اس کی سزا بھکتنی تو پڑٸے گی“ یہ کہہ کر کاشان جن فضاٶں میں اڑتا ہوا غائب ہوگیا جبکہ فضاٶں میں شوہان جادوگر کے چیخنے کی صداٸیں دور تک پھیلتی چلی گٸیں۔
( ختم شد )
0 کمنٹس:
ایک تبصرہ شائع کریں